ملك زاهر تطمئن جمهورها على حالتها الصحية بعد خروجها من المستشفى

خرجت الفنانة ملك زاهر من المستشفى بعد وعكة صحية مفاجئة، وحرصت على طمأنة جمهورها ومحبيها عن حالتها عبر حسابها على إنستجرام.

ملك زاهر تكشف تفاصيل حالتها الصحية

شاركت ملك زاهر جمهورها بتفاصيل حالتها الصحية قائلة: “والله ما كنت متوقعة كل اللي حاصل ده، لما حبيت أشارك حالتي الصحية، كنت مخضوضة جدًا على نفسي. فكرة إن لا أنا ولا الدكاترة عارفين عندي إيه كانت رعباني”. وأضافت: “كنت محتاجة أوصلكم إن حياتي فيها الحلو وفيها الوحش، وقلت في الاستوري إن الموضوع مش الغرض منه القلق، وإني مش عايزة حد يقلق عليا، أنا كويسة، وكده كده أحسن من غيري”.

ملك زاهر: عندي يقين في ربنا

أكدت ملك زاهر ثقتها بالله قائلة: “عندي يقين في ربنا أنه هيقومني بالسلامة، وإن شاء الله تبقى حاجة بسيطة. بس من خضتي كتبت مع أن دي مش طبيعتي إني أشارك الحاجات السلبية. أنا بس مش عارفة أقول إيه من قلبي”.

ملك زاهر تشكر كل من سأل عنها

وجهت ملك زاهر الشكر لكل من سأل عنها ودعا لها قائلة: “بشكر كل حد سأل عليا ودعالي، والله كله كان بيوصلني، وأنا أسفة لو مردتش على حد، وبشكر كل زمايلي وأساتذتي اللي كانوا بيسألوا عليا كل يوم ومسابونيش لحظة، وكل صحابي وعيلتي اللي كانوا جمبي”.

حساسية شديدة في الدم وراء الوعكة الصحية

كشفت ملك زاهر عن حالتها الصحية الحالية قائلة: “أنا الحمد لله بقيت أحسن من الأول وبطلت أروح المستشفى، بحمد ربنا إنها جت على قد كده حتى لو الأيام اللي فاتت كانت صعبة. اللي عندي ده حاجة مخيفة شوية وخضتنا، بس برضه أنا كويسة والحمد لله إنها جت على قد كده، أكيد ربنا حماني من حاجة أكبر”.

وأوضحت: “أهم حاجة إن عرفنا السبب، والحمد لله إننا عرفنا، هي حساسية شديدة في الدم، الموضوع critical، بس أنا مطمنة أنا بخف وبتحسن كل يوم الحمد لله والشكر لله، ومافيش حاجة خطيرة بإذن الله. وأنا أسفة لو كنت قلقتكم بس ده مكانش الغرض أبداً والله، شكراً من كل قلبي على الحب ده، أنا عرفت غلاوتي عندكم وعند كل اللي حواليا، بشكركم من قلبي”.