ريستارت يشعل السوشيال ميديا.. وهجوم ناري من المخرجة على طارق الشناوي
اشتعلت مواقع التواصل الاجتماعي، خلال الساعات الماضية، بتعليقات نارية حول فيلم ريستارت، بعد انتقادات وجهها الناقد الفني طارق الشناوي للعمل، ما استدعى ردًا حادًا من مخرجته سارة وفيق.
هجوم مضاد من مخرجة ريستارت
ردت سارة وفيق، مخرجة الفيلم، عبر حسابها على فيسبوك، على انتقادات الشناوي، قائلة: «أستاذ طارق، في فرق كبير بين الإهانة والنقد! بتقول مفيش موضوع في الفيلم؟ دي حاجة ضحكتني جدًا، إحنا بنتكلم عن موضوع الساعة، موضوع العصر، أكبر موضوع بيهمنا ويخصنا حاليًا».
وأضافت وفيق: «كلامك فكرني بمشهد في الفيلم للفنان محمد ثروت، وهو بيقول: (أنا أعمل أي حاجة عشان أبقى تريند، إحنا خدامين التريند)، وسمع كلام الجوكر (الفنان باسم سمرة) اللي بيشتغل لأغراض ناس. مبروك يا أستاذ طارق، عرفت تبقى تريند من غير ما تنقد الفيلم.. بتخبط في القائمين على العمل بعيدًا عن العمل نفسه، ولا اتكلمت عن إيجابياته ولا سلبياته».
اتهامات بالبحث عن التريند
وتابعت المخرجة الشابة هجومها قائلة: «لا، ههاجم أشخاص وبكده هطلع تريند بسرعة، ده موضوع الفيلم اللي أنت مفهمتوش أصلًا، ولا هو جالك ع الجرح! وعلى فكرة أنا كمان بعرف أعمل تريند، وهنطلع تريند أنا وأنت، بس أنا على حق».
وأكدت وفيق على نجاح الفيلم قائلة: «الرقم اللي متحقق جوه مصر و برا مش مجاملة يا أستاذ طارق، ده الجمهور الحقيقي اللي بنخاطبه، دول مش ولاد أختي مثلًا. الفيلم لسه نازل، وداخل على خمسين مليون داخل مصر فقط، وده نجاح مفرح لكل صناعة، الحمد لله. على العموم دي كلمتك ورأيك، والجمهور قال كلمته برضو».
